A vacina galega contra o coronavirus liderada desde o Ciqus da Universidade de Santiago polo equipo de José Martínez Costas segue a ganar apoios, tanto públicos como privados. Se o proxecto se puxo en marcha nun principio cunha axuda inicial de 150.000 euros concedida polo Instituto de Salud Carlos III, do Ministerio de Ciencia e logo recibiu o respaldo económico do Banco de Santander, con 200.000 euros, agora acaba de obter unha achega de 20.000 euros por parte da empresa galega Urovesa, dedicada á construción de vehículos especiais de gran tonelaxe. Esta última colaboración xestouse a través da campaña de micromecenado da USC Sumo Valor, á que tamén se sumaron cos seus donativos cidadáns particulares.
A proposta galega é absolutamente innovadora, xa que parte dunha tecnoloxía única no mundo creada polo propio equipo que permite programar células de calquera orixe para que elas mesmas fabriquen micro ou nanoesferas nas que se introduce a proteína inactivada do virus, capaz de xerar unha resposta inmune no organismo.
Esta alternativa valeulles tamén para recibir o respaldo da Unión Europea, a través do European Vaccine Initiative, que se encargará de financiar os ensaios preclínicos en animais de laboratorio. Este último respaldo é quizais o máis importante, dado o alto custo destas probas, que se realizarán nun laboratorio de Alemaña. O obxectivo, segundo explica Martínez Costas, é que neste centro se valide primeiro a vacina en ratos humanizados, que foron adaptados xeneticamente para incorporar o receptor humano AGE2, a vía de entrada do virus na célula.
Posteriormente faríanse os ensaios en macacos. En Alemaña tamén realizarán probas en ratos normais para comprobar se xeran anticorpos neutralizantes. Pero antes, e xa de inmediato, efectuarase este mesmo test no Centro de Investigación en Sanidad Animal (CISA) de Valdeolmos (Madrid), xa que un equipo desta institución colabora co grupo galego no desenvolvemento da terapia preventiva.
Fabricación
Os investigadores galegos tamén realizaron experimentos en soro de pacientes curados de coronavirus, facilitados polo hospital de Lugo, e as probas foron positivas. Se toda a maquinaria avanza segundo o previsto, o seguinte paso será un acordo cunha empresa para que se encargue de producir as doses da vacina que se utilizarían nos ensaios clínicos en humanos.
Sería unha fabricación en condicións GMP, o que significa que se cumpre con todos os requisitos de seguridade esixidos pola Unión Europea. Martínez Costas confía en que este proceso poida ser asumido por algunha das empresas do grupo galego Zendal, que xa apoiara no seu momento a solicitude do proxecto ao Instituto de Salud Carlos III.
Fonte: La Voz de Galicia
