Tres startups que ían comer o mundo e naufragaron en 2018

Buscar

Susbcrición Newsletter

Introducir e-mail

Arquivo mensual

Vindeiros eventos

Ano novo, vida nova. O trepidante carrusel que é o mundo das startups nunca deixa de rodar. Nin sequera as que conseguen levantar cifras millonarias, algo ao alcance dunhas poucas elixidas, están a salvo de perecer antes de consolidarse como empresa. Repasamos a continuación algunhas das perdas máis significativas durante 2018 do panorama emprendedor internacional.

Theranos, os tests de sangue milagrosos

Chegou a estar valorada en 10.000 millóns de dólares. A súa fundadora, Elizabeth Holmes, ía ser interpretada por Jennifer Lawrence nunha película sobre a compañía levantada por quen aos 31 anos era a milmillonaria (con fortuna non herdada) máis nova do mundo. Pero todo se veu abaixo a partir de 2015, cando empezaron a aflorar críticas de especialistas sobre os métodos pouco ortodoxos da compañía.

Holmes fundou Theranos en 2003, aos 19 anos. Non tardou en ser coñecida por contar cunha revolucionaria tecnoloxía que lle permitía realizar análise de sangue a partir de mostras significativamente menores que a competencia, o que á súa vez rebaixaba os custos. Chegou a levantar máis de 1000 millóns de dólares e a ser considerada como unha das startups médicas máis prometedoras. En 2015, non obstante, nun artigo de The Washington post, profesionais médicos criticaron os seus métodos, o que levou a SEC (o regulador estadounidense) a abrir unha investigación ao ano seguinte. As conclusións falaban de "fraude masiva": parece que o segredo da súa tecnoloxía era centrarse só en análises que requirían moi pouca cantidade de sangue.

Rethink Robotics, o medio irmán de Roomba

Fundada en 2008 por Rod Brooks, cofundador de iRobot, e a investigadora do MIT Ann Whittaker, Rethink converteuse en pouco tempo nunha referencia na robótica colaborativa e educacional. Malia levantar case 150 millóns de dólares e contar con algunhas das mentes máis brillantes da área da robótica, a compañía non conseguiu a rendibilidade esperada. Unha mostra máis de que triunfar no sector da robótica é dobremente complicado.

Airware, a proba de que a industria dos drons é chinesa

Esta startup de San Francisco desenvolveu un software na nube para axudar a empresas de construción ou minería a inspeccionar as súas instalacións con drons. Mesmo tratou de fabricar os seus propios aparatos, desafiando así o xigante da industria, a chinesa DJI. Non sobreviviu ao envite: malia levantar máis de 100 millóns de dólares nos seus apenas sete anos de vida, incluíndo unha alianza con Mitsubishi para desembarcar en Xapón, a firma viuse obrigada a pechar alegando nun comunicado que "o mercado tardou máis do esperado en madurar".

(Fonte: Retina)