A tele do futuro é galega... automática e intelixente

Buscar

Susbcrición Newsletter

Introducir e-mail

Arquivo mensual

Cos seus matices, a historia de Cinfo podería ser a daquela pequena aldea gala que lle amolaba a Julio César. Ao Imperio romano. A tecnolóxica galega, especializada na produción automática de vídeo e nos soportes de última xeración, fíxose un oco en tempo récord nun mundo de xigantes: ese no que habitan as plataformas dixitais e os grandes consorcios multimedia de carácter global.

Segue sendo unha empresa pequena, pero as súas solucións espertaron o interese non só dos operadores e empresas do sector, senón tamén dos grandes fondos de investimento, ávidos de poñer os seus diñeiros nas compañías encargadas de pensar e deseñar o futuro. Todo indica que Cinfo podería ser unha delas.

A firma coruñesa naceu na súa orixe dentro de R. En xullo do ano pasado, tres dos directivos que pilotaran esta división compráronlla a Euskaltel para emprender unha aventura en solitario. En realidade, a súa aposta empezara no 2015, antes da compra da operadora galega por parte da vasca Euskaltel, cando dende a división de R se fixeron con varias patentes relacionadas co vídeo automatizado e a intelixencia artificial (IA) desenvolvidas na Universidade da Coruña, e que previamente testaran e validaran.

Esas patentes consolidaron a aposta empresarial do que hoxe é Cinfo. De feito, boa parte do equipo da firma procede das divisións da universidade que desenvolveron aquelas solucións: enxeñeiros de vídeo, especialistas en IA... Pero, ¿que é o que fai exactamente a tecnolóxica galega? Basicamente, vídeo en tempo real totalmente automatizado, isto é, gravado cunhas cámaras instaladas nun campo de fútbol, nun escenario ou nunha empresa e producido e editado cun software propio, polo tanto, moito máis barato que a produción convencional.

A compañía coruñesa localizada no edificio Citic da UdC (alí onde se crearon as citadas patentes) especializouse en tres mercados: o da nova televisión, o industrial e o educativo. E en cada un deles foi desenvolvendo proxectos, ao extremo de que pechou o 2018 cunhas vendas de 2,8 millóns de euros.

A versatilidade de Cinfo, a capacidade de ofrecer produtos altamente personalizados aos seus clientes que incorporan ademais tecnoloxías de última xeración (3D, realidade aumentada,...), converteuse nun dos piares da súa irrupción no mercado, e un sinal distintivo respecto doutros competidores.

Videoconferencia de traballo con Tokyo cada venres

Cada venres, o equipo directivo de Cinfo conecta por videoconferencia con Tokyo. Ao outro lado da pantalla espéraos Jesús Perezagua, o cuarto accionista da tecnolóxica galega. O que foi presidente de Fox Europa vive na capital nipoa e entrou na antiga división de R no 2015 como investidor para conseguir as valiosas patentes desenvolvidas no seo da UdC. E quedou tras a venda. "Participa no desenvolvemento de negocio e no día a día da empresa -explica Antonio del Corral, presidente de Cinfo-. Cada venres analizamos as oportunidades comerciais porque ten todos os contactos no mundo da televisión".

As avanzadas solucións creadas pola firma coruñesa e este intenso traballo comercial tiveron xa unha repercusión directa no balance da compañía, que prevé pechar o 2019 cunhas vendas de 3,6 millóns, que poderían chegar aos catro se se pechan algunhas operacións. E é que Cinfo ten xa pechados ou en negociacións contratos en España, México, Xapón, Colombia, Polonia, Honduras...

A empresa forma parte tamén dunha das UTEs que desenvolverán os proxectos piloto para a implantación da tecnoloxía 5G en España, impulsados polo Ministerio de Industria. En concreto, o programa no que traballa Cinfo centrarase en dúas experiencias: por un lado, unha retransmisión dun partido do Deportivo da Coruña e, por outro, unha emisión en tempo real en Navantia da construción virtual dun buque.

(Fonte: La Voz de Galicia)