O grupo galego Hispamoldes, con sede central en Tecnópole e especializado no deseño e fabricación de moldes para pezas exteriores e interiores do automóbil, inaugurará en abril a súa segunda factoría en Marrocos, segundo confirmou a empresa. A nova fábrica ocupará 1200 metros cadrados na Zona Franca de Tánxer, empregará 40 persoas no seu primeiro ano e dedicarase ao mantemento de moldes e ferramentas, así como á súa construción.
A empresa Redegal, con sede central en Tecnópole, acaba de abrir unha nova oficina en Vigo. Segundo os seus responsables, trátase dun paso estratéxico para crear sinerxías, afianzar relacións e atopar novos nichos de mercado onde ofrecer os seus servizos de tecnoloxía, baseados dende a súa orixe na innovación e orientados, na actualidade, ao desenvolvemento de solucións de comercio electrónico e aplicacións móbiles.
Coasa, a compañía do grupo vasco Aernnova que ten a súa fábrica no Parque Tecnolóxico de Galicia, asegura a súa carga de traballo grazas aos contratos de subministracións para Airbus. A compañía, que conta con 327 empregados e prevé facturar este ano 34 millóns de euros, participa no novo modelo de avión europeo.
Grupo T-Solar, un dos principais operadores mundiais no mercado de xeración de electricidade de orixe solar fotovoltaica, acaba de asinar tres empréstitos por un total de 145 millóns de dólares cos que pecha o financiamento das dúas centrais fotovoltaicas de 44 MW que a compañía está a construír en Arequipa, ao sur de Perú.
A comunidade de Tecnópole na rede de microblogging Twitter non deixou de crecer desde a súa posta en marcha. Neste momento, son máis de 990 os seguidores de Parque Tecnolóxico de Galicia neste canal e para celebrar a inminente chegada do follower número 1000 enviaráselle un obsequio sorpresa á persoa que coincida con esa cifra.
Sonen Acústica, situada no Centro de Empresas e Innovación (CEI) de Tecnópole, foi distinguida polo Círculo de Xóvenes Empresarios de Ourense co Premio Novo Empresario 2011.
Tecnópole volveu ser referente en 2010 do Programa de Cooperación entre Parques Industriais e Tecnolóxicos (COPIT), despois de que a súa experiencia de colaboración cos polígonos de San Cibrao das Viñas (Ourense) e Sabón e Bergondo (A Coruña) fora elixida xa en 2009 como caso de éxito entre todas as levadas a cabo en España.
O próximo 13 de decembro terá lugar en Tecnópole a xornada de brokerage ‘Innovar con éxito’, organizada no marco da Rede REAL co obxectivo de conectar as necesidades das empresas do sector alimentario coa oferta científica e tecnolóxica dos centros de coñecemento da Eurorrexión Galicia-Norte de Portugal. O prazo de inscrición está aberto ata o día 9 de decembro utilizando esta folla de inscrición.
O dispositivo iKinect, que permite controlar o ordenador cos nosos propios movementos sen necesidade de usar o rato e o teclado, foi o gañador absoluto da 'Galiciencia 2011', celebrada en Tecnópole entre o 23 e o 25 de novembro. Este proxecto foi o vencedor na categoría de 2º ciclo da ESO e gañador absoluto por impoñerse en puntuación aos dos outros dous equipos gañadores nas categorías de 1º ciclo da ESO e Bacharelato. Martín Alvarez, Adrián González e Luis Rodríguez, do IES O Couto (Ourense), adaptaron a cámara da videoconsola Xbox para que permitise unha interacción total do usuario cos controis de calquera ordenador.
A maior feira científica de Galicia, 'Galiciencia', será este ano actividade de referencia da Semana da Ciencia 2011 en España por medio da Fundación Española para a Ciencia e a Tecnoloxía (FECYT), patrocinadora do evento xunto coa Consellería de Economía e Industria. Durante os días 23, 24 e 25 de novembro a entidade organizadora, Tecnópole -Parque Tecnolóxico de Galicia- acollerá no seu recinto de Ourense unha carpa na que 51 equipos de estudantes de toda Galicia, Cataluña e Euskadi mostrarán ao público os seus proxectos científicos e de innovación.
