Tecnópole organiza 'Espectáculos de ciencia' para 8000 estudantes por toda Galicia durante os próximos catro meses

Buscar

Susbcrición Newsletter

Introducir e-mail

Arquivo mensual

Vindeiros eventos

Preto de 8000 estudantes en total participarán nos 'Espectáculos de ciencia' que Tecnópole organizará por toda Galicia durante os próximos catro meses. O primeiro deles, titulado 'Ciencia ou ficción', comezou este mércores en Ourense con dúas sesións e repetirase os próximos días en Lugo, Santiago, A Coruña e Pontevedra.
 
Ata o mes de maio celebraranse outros tres espectáculos diferentes que tamén viaxarán a Ferrol e Vigo, todos eles financiados pola Consellería de Economía e Industria e da Fundación Barrié.
 
As sesións están dirixidas a estudantes de Secundaria, Bacharelato e Ciclos Formativos, adaptándose en cada caso os contidos ao nivel académico dos asistentes. O obxectivo desta experiencia é levar a ciencia do xeito máis didáctico e ameno aos máis novos. Ao longo dos 50 minutos que dura cada sesión, os asistentes participan en experiencias espectaculares que son o vehículo para introducir conceptos científico-tecnolóxicos. Isto serve para espertar nos rapaces e rapazas, que asisten acompañados polos seus profesores, a curiosidade e a inquietude que nun futuro os poden orientar cara a carreira científica ou cara a actitudes e aptitudes de emprendemento innovador.
 
Ciencia ou ficción
 
A primeira actividade permitiu a 300 estudantes ourensáns explorar os vínculos entre a ciencia e a ficción a través do visionado de fragmentos de películas e a realización de experimentos cos que abordaron unha análise crítica do que vemos no cinema. A través de secuencias de filmes como 'Mars Attacks', 'Tiburón' ou clásicos como 'A Guerra das Galaxias' e 'O sabuxo dos Baskerville'' os asistentes puideron concluír por eles mesmos que acontece detrás e diante das cámaras para recrear o mundo de fantasía que mostra a pantalla.
 
Outros tantos estudantes vivirán esta experiencia o xoves en Lugo, o venres en Santiago de Compostela e, a semana que vén, o xoves na Coruña e o venres en Pontevedra.
 
Esta é a primeira dunha serie de actividades deseñadas especialmente para conmemorar o 20 aniversario do Parque Tecnolóxico de Galicia, que se estenderán ao longo de todo o ano. Á marxe de diversas iniciativas dirixidas especificamente ao tecido empresarial e a todo o Sistema Galego de Innovación, esta programación inclúe un congreso de mentes innovadoras que coincidirá co mes no que se cumpren exactamente os vinte anos de actividade (outubro).
 
(Fonte: Tecnópole)