Os paneis solares pódense usar para ter calefacción e aire acondicionado

Buscar

Susbcrición Newsletter

Introducir e-mail

Vindeiros eventos

O uso de placas solares para producir auga quente sanitaria é o habitual, pero investigadores das universidades Carlos III e Politécnica de Madrid formulan que tamén poden proporcionar calor en inverno e frío en verán nas grandes oficinas. A súa proposta é incorporar captadores solares a un sistema de coxeración por gas e máquina de absorción, o que reduciría custos e emisións de CO2.

Aínda son poucos, pero algúns centros comerciais e grandes estacións, como a de Atocha en Madrid, contan con sistemas de trixeneración que producen electricidade, frío e calor. Un motor de gas xera a electricidade e a calor residual aprovéitase directamente en inverno para o circuíto de calefacción ou, en verán, para alimentar unha máquina de absorción que arrefría a auga do aire acondicionado.

Agora enxeñeiros da Universidade Carlos III (UC3M) e Politécnica (UPM) de Madrid idearon un modelo que optimiza este sistema para reducir ao máximo o gasto enerxético e as emisións de CO2, e que, ademais, como novidade, pode incorporar captadores solares. O sistema, cuxos detalles se publican na revista Applied Thermal Engineering, está pensado para complexos de oficinas.

"A normativa obriga a colocar paneis solares nos edificios unicamente para atender a demanda de auga quente sanitaria, pero nas oficinas apenas hai duchas nin cociñas, así que a idea é que parte da demanda de calefacción en inverno e climatización -aire acondicionado- en verán se poida atender con enerxía solar," explica Pedro A. Rodríguez, profesor da UC3M e autor principal do traballo.

Para crear o modelo consideráronse os requirimentos enerxéticos dos edificios e os datos climatolóxicos mensuais -temperaturas e irradiación solar- do ámbito da Comunidade de Madrid. O sistema permite subministrar frío ou calor segundo as necesidades particulares diarias de cada oficina, que poden variar sobre todo en primavera e outono.

Os investigadores aplican un 'coeficiente de mérito' como ferramenta de decisión para aforrar enerxía e operar a planta de trixeneración híbrida, que proporciona 1,7 MW de electricidade, 1,3 MW de calefacción e 2 MW de climatización. Pódese implantar nun parque de oficinas de 50.000 m2 unidas por dous aneis dun quilómetro de lonxitude, para os circuítos de frío e calor, seguindo a rede de sumidoiros ou outras liñas de servizo subterráneas.

Menos emisións de CO2

"Esta solución híbrida aumenta o período de amortización -superior a 14 anos- dado o custo de investimento da planta solar, pero permite unha maior redución en emisións de CO2, de 1527 T/ano a 1760 T/ano, así como un aforro na enerxía primaria e unha pequena mellora nos beneficios anuais,", destaca Mª Carmen Rodríguez Hidalgo, investigadora da UPM e coautora do traballo.

A enxeñeira recorda que a necesidade de enerxía para calefacción e aire acondicionado de edificios en España "é primordial no contexto da folla de ruta Europea cara a un medio sen emisións de CO2, polo que é altamente desexable un aumento das redes de distrito para calefacción e climatización como a proposta, moi escasas no noso país".

(Fonte: SINC)