O sector agroalimentario galego desenvolve novidosas técnicas de I+D+i para mellorar a calidade e seguridade dos alimentos

Buscar

Susbcrición Newsletter

Introducir e-mail

Vindeiros eventos

Non hai eventos polo momento
Nos últimos anos, o sector agroalimentario galego centrou os seus esforzos en garantir a calidade e a seguridade alimentaria, dende que un produto se xera ata que chega ao consumidor final. Sobre este tema xirou o DemoLab do sector agroalimentario organizado recentemente polo Centro de Excelencia de Vigo.

Durante a xornada, celebrada nas instalacións de Anfaco-Cecopesca e á que asistiron máis de medio centenar de investigadores do centro tecnolóxico e empresas provedoras de tecnoloxía para a industria alimentaria, presentáronse novas tecnoloxías de procesado e conservación de alimentos, sistemas de control de calidade a través de biosensores ou innovadoras aplicacións para a valorización dos subprodutos da industria alimentaria, entre outras.

Ademais da exposición teórica dos proxectos, realizáronse diversas demostracións nas cales os asistentes puideron comprobar a aplicabilidade e a eficacia destas novas tecnoloxías.

Innovación en produto e proceso

José Luis Meniño, responsable da Unidade de Novas Tecnoloxías de Conservación de Anfaco-Cecopesca, explicou como as novas tecnoloxías aplicadas á conservación de alimentos -o quentamento óhmico, os ultrasóns, pulsos eléctricos, radiofrecuencias, microondas, etc. - ofrecen a posibilidade de obter produtos mellorados minimamente procesados e que conservan mellor as súas propiedades.

Na mesma liña, Carole Tonello, de Hiperbaric España, presentou o sistema de procesado de alimentos por altas presións como alternativa ás tecnoloxías habituais de pasteurización térmica, que permite alongar a vida útil dun produto, evitando a utilización de altas temperaturas que o degradan sensorialmente. Trátase dun sistema moi estendido en países como Estados Unidos e que se aplica principalmente a produtos como o guacamole, os zumes, a tenreira crúa, os embutidos cocidos...

Por outra banda, Asier Albizu, director xeral de Biolan, deu a coñecer un novidoso mecanismo portátil que, a través da combinación de biotecnoloxía e electrónica, mide diferentes parámetros nos alimentos, en tan só tres minutos. O sistema permite coñecer, por exemplo, o nivel de lactosa no leite, o mercurio no peixe ou o colesterol nos embutidos.

Diego Méndez, responsable da División de Medio e Valorización de Produtos do Mar de Anfaco-Cecopesca, destacou a importancia da revalorización dos subprodutos da industria alimentaria e presentou o spray dryer, unha técnica que permite encapsular substancias e obter novos produtos en po de modo rápido e uniforme.

No ámbito do control e mellora dos procesos, Alberto Ares, director de CTI Consultores, compartiu o funcionamento da plataforma REDETAG, que subministra información en tempo real para optimizar as actividades produtivas do sector mar-industria, dende o lanzamento da orde de produción, ata o produto rematado.

A importancia dos cociñeiros

O prestixioso cociñeiro Pepe Solla foi o encargado de clausurar a actividade presentando o proxecto do Centro de Evolución Gastronómica de Galicia que, promovido polo Consorcio da Zona Franca de Vigo, ten por obxectivo agrupar a todos os axentes implicados na innovación gastronómica para realizar proxectos que cheguen ao conxunto da sociedade.

Durante a súa intervención, Solla puxo de manifesto que o segredo do éxito mundial da gastronomía española se atopa na innovación e a excelencia, e reivindicou a importancia da participación dos cociñeiros no proceso de desenvolvemento de novas técnicas aplicadas á gastronomía. Na parte demostrativa, o xefe de cociña Estrella Michelín gabou a evolución en calidade das conservas españolas e mostrou que se trata dun gran recurso para cociñar pratos sinxelos e ricos en pouco tempo.

(Fonte: Innovamás)