O gasto español en I+D caeu o 4,1% en 2011

O gasto en Investigación e Desenvolvemento (I+D) reduciuse en España o 4,1 por cento en 2011 respecto ao ano anterior, segundo o avance provisional da estatística sobre actividades en I+D facilitado polo Instituto Nacional de Estatística (INE).

Segundo o INE, o investimneto en I+D contraeuse despois de que o gasto empresarial se reducise o 5,4% e o público (administración pública e ensino superior) o 3,3%.

O número de persoas dedicado a actividades de I+D a xornada completa baixou o 4,1% no sector privado e o 2,9% na administración pública e o ensino superior.

Os datos incluídos neste avance realizáronse considerando as 213 empresas con maior gasto en I+D en 2010. Estas empresas representaron o 40,8% do investimento empresarial en I+D dese ano.

O INE tamén tivo en conta a información recollida ata a data da administración pública e o ensino superior.

Os resultados definitivos do gasto en I+D publicaranse o próximo novembro.

(Fonte: EFE)