O bioplástico escóndese no lixo

Buscar

Susbcrición Newsletter

Introducir e-mail

Arquivo mensual

Vindeiros eventos

Non hai eventos polo momento
As cáscaras de patacas ou os restos do filete que tiran ao lixo os europeos poderían converterse na materia prima para a produción de bioplásticos, unha iniciativa do Sétimo Programa Marco da Comisión Europea pretende usar o refugallo municipal para xerar biopolímeros, a base dos bioplásticos.

O uso de bioplásticos popularizouse como alternativa ante os plásticos convencionais, fabricados con derivados do petróleo. Esta industria creceu un 20% cada ano, de acordo a European Bioplastics, asociación que representa os intereses do dito sector.

O 1% da produción mundial

Os bioplásticos representan o 1% da produción mundial, que está en torno aos 250 millóns de toneladas ao ano, segundo Álvaro Estrada do Departamento de Información Técnica do Instituto Tecnolóxico do Plástico (AIMPLAS).

Nesta liña o proxecto "Biopolímeros a partir da fermentación de syngas" (SYNPOL, en inglés), implementará tecnoloxía para converter o carbono contido nos refugallos en syngas, unha substancia composta de monóxido de carbono e CO2.

Este syngas utilízase para alimentar bacterias e permitir que produzan bioplástico. Actualmente a maioría dos bioplásticos son producidos a partir de fontes como a pataca, millo, trigo, ou chícharo. O proxecto piloto é a primeira iniciativa europea que espera impulsar a produción de bioplásticos a partir de residuos e en España será liderado polo Consello Superior de Investigacións Científicas (CSIC).

Reducir custos, un reto

María Auxiliadora Prieto do Centro de Investigacións Biolóxicas do CSIC dixo a Efe que este proxecto podería reducir o custo da produción de bioplásticos, ademais de ter un menor impacto medioambiental e diminuír o uso de disolventes contaminantes.

O CSIC desenvolveu con anterioridade proxectos para producir bioplásticos, os seus científicos idearon un sistema baseado en bacterias capaces de autodestruírse e liberar o bioplástico producido no seu interior.

Este proceso reduciu nun 30 % os custos de produción de bioplásticos e xa foi patentado pola empresa española Biopolis S.L., especializada en biotecnoloxía microbiana.

Prieto afirmou que un dos principais desafíos de transformar residuos en materia prima para bioplásticos é que o proceso poida reproducirse de forma masiva.

"Non sabemos se o rendemento vai ser adecuado, este procedemento xa se fixo e sábese que as bacterias son capaces de alimentarse a partir de syngas e incluso que poden producir bioplásticos, pero non sabemos se imos producir o suficiente como para que sexa rendible.", confirmou.

Asegurou que ao utilizar residuos para a produción de bioplástico, non se compite co sector alimenticio pola materia prima.

(Fonte: EFE)