Investigadores europeos dan un impulso aos biocombustibles

Buscar

Susbcrición Newsletter

Introducir e-mail

Arquivo mensual

Vindeiros eventos

A pesar de constituír unha fonte atractiva de enerxía desde os puntos de vista ambiental e económico, os biocombustibles tamén poden exercer un efecto corrosivo nos motores, motivo polo que non poucos consumidores europeos perderon a confianza nesta clase de enerxía non contaminante.
 
Pero agora un consorcio de investigadores de República Checa, Alemaña, España, Finlandia e Reino Unido achou un posible remedio a este inconveniente que podería devolver a confianza nos biocombustibles.
 
Os biocombustibles derívanse de plantas que absorben CO2 de maneira natural, polo que son moito menos contaminantes e moito máis abundantes que as areas petrolíferas. No entanto, tamén conteñen unha proporción elevada de auga e osíxeno, o que exerce un efecto corrosivo nos motores. Os combustibles híbridos para a automoción, como o E10, que se compón dun 10% de etanol e un 90% de gasolina, perderon popularidade rapidamente nalgunhas partes de Europa. Segundo unha enquisa recente, preto do 70% dos condutores alemáns móstranse escépticos ante o bioetanol e consideran que é prexudicial para o motor do seu automóbil.
 
Até agora a industria do transporte reaccionou a este problema diluíndo etanol en combustible común e adaptando a gasolina obtida aos estándares existentes relativos a motores. Pero agora o equipo de investigadores mencionado, conformado como parte dunha agrupación ou clúster de investigación de EUREKA, adoptou unha formulación distinta e optou por cambiar o motor en lugar da mestura de combustible.
 
Plataforma de 39 socios
 
EUREKA é unha plataforma de empresarios dedicados á investigación e o desenvolvemento (I+D) en Europa e está composta por 39 socios entre os que se atopa a Comisión Europea. Os clústeres de EUREKA son asociacións público-privadas estratéxicas a longo prazo cuxo obxectivo é desenvolver tecnoloxías xenéricas de importancia clave para a competitividade europea. Moitas empresas europeas de primeira liña participan en clústeres EUREKA.
 
O equipo propúxose modificar o deseño dos motores para adaptalos aos combustibles non convencionais. Para iso reformulouse o acabado de cada compoñente en lugar de modificar as súas estruturas tradicionais.
 
“O resultado é non só unha nova clase de motores adaptados aos biocombustibles; tamén son menos ruidosos e máis duradeiros”, asegurou a coordinadora do proxecto, a Dra. Amaya Igartua, investigadora senior do instituto español de investigación Tekniker-IK4. “A cuestión da calidade dos combustibles mesturados dispoñibles, causada pola súa tendencia a absorber auga, forneceu un efecto prexudicial no mercado. Por iso temos que proceder paso a paso. O propósito primordial do proxecto era o de mellorar unha tecnoloxía que xa está dispoñible adaptándoa aos tipos de mesturas de combustibles de uso máis estendido, desde E10 até E30”.
 
Con todo, Iñaki Aguinaga, de Guascor-Dresser Rand, un dos principais socios industriais do proxecto, puntualizou que o mercado europeo podería non estar listo aínda para a introdución desta nova tecnoloxía, motivo polo que no transcurso do proxecto ensaiaron os seus achados en mercados europeos, concretamente en Brasil e en Venezuela. “Pretendiamos vender en partes do mundo onde os consumidores consideran os biocombustibles unha solución viable. O que aprendemos neste proxecto, é dicir, a maneira de remediar o efecto corrosivo do biocombustible, podería aplicarse tamén ao uso de gas ou biomasa, que tamén presentan problemas de corrosión”.
 
Unha das desvantaxes percibidas con respecto aos biocombustibles é que a crecente demanda de materias primas para estes podería provocar un incremento dos prezos dos alimentos a escala mundial, pero o equipo de EUREKA asegura que se aveciña unha nova xeración de combustibles cuxo compoñente principal non está baseado en produtos alimentarios. “Pareceunos importante ter en conta os chamados biocombustibles de segunda xeración e os baseados en algas, posto que representan unha fonte de enerxía moi prometedora de cara ao futuro”, asegurou Igartua.
 
Este proxecto achanda o camiño para futuras investigacións orientadas á introdución de mesturas de combustibles cunha concentración máis elevada de etanol.
 
(Fonte: Cordis)