A industria agroalimentaria galega, madriña dos máis innovadores

Buscar

Susbcrición Newsletter

Introducir e-mail

Arquivo mensual

Vindeiros eventos

Non hai eventos polo momento

Imaxínanse un alimento que, ademais de todas as súas propiedades nutritivas axude a previr ou a curar unha enfermidade autoinmune? Ou poder poñer fin á escaseza de terras mediante diferentes técnicas de cultivo que permiten sacar adiante producións en espazos reducidos? A industria do futuro xa está aquí e o sector agroalimentario galego non é alleo a ela. Todo o contrario. A través do programa Business Factory Food (BFF), do Clúster Alimentario de Galicia, unha ducia de grandes industrias da comunidade mentorizarán e promoverán oito proxectos innovadores que lles axudará a dar resposta a eses retos de futuro. A idea é axudar a desenvolver ideas que poidan ter aplicacións moi interesantes para o sector agroalimentario. 

Un total de 38 iniciativas presentáronse a esta nova convocatoria do BFF, a aceleradora de proxectos posta en marcha polo Clúster en colaboración coa Xunta. Deles foron preseleccionados 18, pero só oito conseguiron pasar o corte final. Todos teñen algo en común, explicaron Patricia Agerey, directora da Axencia Galega de Innovación (Gain), e Juan Manuel Cividanes, director do Instituto Galego de Promoción Económica (Igape), constitúen solucións innovadoras para facer fronte aos retos da industria agroalimentaria galega nas áreas de dixitalización, automatización, loxística, sustentabilidade, packaging e desenvolvemento de novos produtos. Os seleccionados accederán a un programa de apoio integral de nove meses de duración e o financiamento por parte da Xunta. Concretamente, recibirán 25.000 euros a fondo perdido e poderán solicitar un préstamo participativo de ata un máximo de 50.000 euros. 

Agricultura para cidades 

O primeiro dos proxectos seleccionados é o de Biopraedium, unha empresa que se dedica a dar solucións de agricultura para cidades. A idea é que, coas características das vivendas actuais, nas que case non hai espazo, se poidan implementar solucións que permitan o cultivo de alimentos dunha forma sustentable. Para iso utilizan sistemas de hidroponia, aeroponia e acuaponia, explica Javier Casal, responsable desta firma. Durante os vindeiros nove meses traballarán con Capsa Food «buscando a maneira de aproveitar certos espazos que teñen», engadiu Casal. 

Cos insectos traballa Galinsect, un proxecto vigués que cría e comercializa insectos para satisfacer a demanda de proteína limpa e sustentable medioambientalmente para o mercado acuícola, gandeiro e de mascotas. Neste caso serán Viña Costeira e o Grupo Nueva Pescanova os que explorarán as posibilidades desta iniciativa. 

En HK Smart Food colaborarán con Cafés Candelas para tratar de conectar ás marcas cos seus clientes. Para iso deseñarán toda unha serie de sensores que permitirán coñecer in situ a experiencia dos consumidores. Información que será analizada a través dunha aplicación para que as empresas poidan tela en conta, por exemplo, á hora de deseñar novos produtos. 

Pola súa parte, Starterlabs dedicarase a deseñar e desenvolver ingredientes bioactivos para a industria da alimentación. A idea é que estes compostos aporten propiedades saudables aos alimentos dunha forma natural, de tal forma que, por exemplo, este teña compoñentes antioxidantes. Larsa e Dairylac ocuparanse desta iniciativa na que «deseñaremos un ingrediente bioactivo de alta innovación e apto para multitude de alimentos», explica Alfredo Bermúdez, responsable da firma. 

Alimentos con propiedades 

Con alimentos traballará tamén Smart Vitamins, unhaa spin off da Universidade de Santiago de Compostela . «Queremos adaptar novas fórmulas que nos permitan crear tratamentos para enfermidades neurodexenerativas e autoinmunes a través de alimentos naturais», explica Ana Olivera, voceira do proxecto que estará mentorizado polo propio Clúster da Alimentación. 

O desenvolvemento de novos produtos centrará o traballo de Herooj, un proxecto chegado desde Barcelona e que ofrecerá hidroxeis, barritas enerxéticas, hipertónicos e isotónicos 100 % ecolóxicos e naturais feitos con base de auga de mar. O proxecto estará apoiado por Clavo Food e Gadisa. 

As dúas últimas iniciativas seleccionadas céntranse na trazabilidade. Sitrav, por exemplo, busca solucións ao reto da dixitalización e automatización da industria. Para iso, desenvolve un sistema intelixente de trazabilidade de recollida, explotación e posta a disposición de datos relacionados cos sistemas de produción industrial. Congalsa mentorizará este proxecto. Pola súa parte, Kiwanda céntrase no reto loxístico da industria. Ofrece unha solución aos problemas de inventario e trazabilidade na cadea de subministro, automatizando procesos de identificación e control. Neste caso, será Kiwi Atlántico a que axudará ao desenvolvemento desta iniciativa. 

Fonte: La Voz de Galicia