Fondos privados e públicos buscan dez proxectos bio para investir na xornada que se celebrará en Tecnópole

Buscar

Susbcrición Newsletter

Introducir e-mail

Arquivo mensual

Vindeiros eventos

Non hai eventos polo momento
A Axencia Galega de Innovación (GAIN) promove e organiza, coa colaboración do Clúster Tecnolóxico Empresarial das Ciencias da Vida (Bioga) e Tecnópole, a III edición da Lonxa de Financiamento Bio, que terá lugar o próximo 9 de outubro no Parque Tecnolóxico de Galicia.

O Bio Investor Day, como foi denominado, continúa a liña de apoio da Xunta de Galicia ao emprendemento galego e ao sector biotecnolóxico. O evento contará coa participación de oito entidades de investimento. A Xunta de Galicia, a través dos Fondos I2C, lidera a iniciativa, na que participarán tamén os fondos autonómicos Unirisco/Uninvest e XesGalicia. Tamén no ámbito público pero a nivel nacional, a Lonxa contará coa representación do CDTI. Pola parte privada, o apoio financeiro concentrarase en tres investidores: Cros Road Biotech, PrincipiaTech e SuanFarma Biotech. Este sete fondos complétanse coa participación do israelí Kerentech.

Emprendedores, investigadores e persoal directivo de empresas biotecnolóxicas galegas interesadas na posta en marcha dun proxecto ou en conseguir consolidarse no mercado presentaron as súas solicitudes de participación durante o mes de setembro. Entre todas as ideas de proxecto recibidas están a seleccionarse as dez con maior potencial, que serán convidadas a participar na Lonxa de financiamento.

Entre as novidades desta edición inclúese para os dez proxectos seleccionados a posibilidade de participar nunha sesión preparatoria da Lonxa na que terán a oportunidade de practicar e formarse en habilidades comunicativas e, ademais, terán á súa disposición unha titoría individualizada con expertos para profundar sobre a súa idea de negocio.

A xornada será inaugurada polo director da GAIN, Manuel Varela, e, ademais de acoller as roldas de presentación dos proxectos, completarase con dous relatorios: “Instrumentos do CDTI para o financiamento de proxectos de I+D”, a cargo de M.ª Pilar Sanz, do Departamento de Saúde, Bioeconomía, Clima e Recursos Naturais da Dirección de Promoción e Cooperación do CDTI, e “Transferencia de tecnoloxía e fomento do emprendimiento biotecnolóxico en Israel”, por parte de Esther Moscatel, socia de Kerentech.

A mañá finalizará cunha mesa redonda entre os fondos participantes sobre o “Ecosistema para o financiamento de proxectos bio”. Tras unha comida networking, terán lugar encontros bilaterais privados entre os fondos e as empresas interesadas.

(Fonte: Bioga)