Febre polos bootcamps: ¿pódese aprender a programar en semanas?

Buscar

Susbcrición Newsletter

Introducir e-mail

Arquivo mensual

A ausencia de perfís dixitais no mercado laboral provocou a proliferación destes cursos intensivos de programación, que prometen converter o alumno en desenvolvedor nuns poucos meses.

Cando Teodoro Díaz solicitou entrar no bootcamp de desenvolvedor de Ironhack, o ano pasado, xamais escribira unha liña de código. "Eu non sabía nada de ordenadores. Ao saír do instituto, con 18 anos, alisteime no Exército. Aos 6 anos deixeino e saquei a licenza para traballar en seguridade privada, estiven catro meses en Somalia protexendo un atuneiro español e ao volver destináronme á embaixada de Estados Unidos en Madrid", explica.

Con 27 anos e tras chegar a ser xefe de equipo, Díaz decidiu que necesitaba un cambio. Unha amiga recomendoulle que entrase no mundo do desenvolvemento de software e decidiu probar sorte. "Eu pensaba que non me ían coller", confesa. Para a súa sorpresa, non só o colleron senón que antes de que rematasen as nove semanas de bootcamp ofrecéronlle quedar na escola como profesor asistente. "Tiña un fillo e a miña muller estaba embarazada. Estaba alí de 7 a 21. Foron uns meses moi duros pero tiveron recompensa", recorda. Dende marzo, Díaz traballa como desenvolvedor en Cabify e en agosto ascendérono.

O seu é un caso máis entre os miles de alumnos que cada ano recorren a un destes programas co desexo de adquirir as competencias dixitais que tanto demanda o mercado. Segundo cálculos da Comisión Europea, medio millón de empregos quedarán vacantes en 2020 pola falta de perfís tecnolóxicos nos países europeos.

"Existe un déficit de profesións dixitais tanto en España como en Europa. Hai informes que falan de máis de 300.000 postos sen cubrir o ano pasado. É moi difícil de cuantificar pero hai moita demanda destes profesionais. O máis importante é que as empresas están desesperadas por atopar perfís dixitais", sinala Luis Miguel Olivas, responsable de empregabilidade da Fundación Telefónica.

A institución levou a cabo unha análise, baseándose nas ofertas de traballo publicadas en Infojobs e tecnoempleo.com, para detectar cales son os perfís e as habilidades máis demandadas polas empresas. "A profesión máis demandada segue sendo a de desenvolvedor de software, pero cada vez máis se están a demandar novos perfís como o de desenvolvedor full stack ou o de experto en ciberseguridade", apunta Olivas.

Auxe dos bootcamps

Precisamente, para paliar a escasa formación dixital que existe no mercado laboral español xurdiron nos últimos anos múltiples escolas que ofertan estes bootcamps, cursos intensivos para desenvolver habilidades de programación nuns poucos meses.

"Os bootcamp nacen en 2012 en Silicon Valley por unha necesidade natural: as empresas non atopaban o talento que necesitaban na universidade", explica Álvaro López-Cotelo, director xeral de Ironhack en Madrid, a primeira academia en España que comezou a ofrecer estas formacións. Iso foi en 2013, dende entón graduáronse na escola máis de 3500 alumnos e abriron sedes en Barcelona, Ámsterdam, Berlín, Lisboa, Cidade de México, Miami e Sao Paulo.

Detrás deste auxe dos bootcamps, sinala López-Cotelo, está a desconexión entre o que se ensina nas universidades e o que realmente demandan as empresas. "Nos graos de enxeñería informática a formación é boa, pero hai determinadas cousas que esixen as empresas nas que non se forma os enxeñeiros. Moitas veces ensínanselles linguaxes obsoletas ou simplemente non se afonda", asegura.

Unha das principais características destes cursos é a súa curta duración, se se compara cunha carreira ou un máster tradicional. As escolas prometen formar o alumno nun prazo de entre 9 e 12 semanas, aínda que parta sen ningún coñecemento previo. "É como levar a túa mente ao ximnasio", explica Gus de Vita, fundador de Le Wagon España. "A metodoloxía baséase en moi pouca teoría e moitísima práctica. As universidades poñen moito o foco no futuro, mentres que no bootcamp te preparas pola mañá para os retos que terás que resolver despois de comer", apunta.

Este brasileiro, extraballador de eDreams e Softonic, cursou en 2015 o bootcamp de Le Wagon en Bruxelas e quedou tan impresionado que decidiu traelo a España. En 2016 inaugurou a primeira escola en Barcelona e este ano abriu tamén en Madrid. "É un reto intelectual enorme porque che cambia a forma de pensar. Ao final do curso logramos que a mente do alumno sexa capaz de traballar na resolución de problemas dunha forma moito máis eficiente", destaca.

(Fonte: Expansión)