Éxito de participación dos centros educativos galegos nas actividades da Aula Newton

Buscar

Susbcrición Newsletter

Introducir e-mail

Arquivo mensual

Vindeiros eventos

Non hai eventos polo momento

Os centros de educación Secundaria de Galicia amosaron un elevado interese por participar nas actividades da Aula Newton, situada no Parque Tecnolóxico de Galicia, o que propiciou que as 18 sesións previstas ata o mes de xuño se esgotasen en apenas 4 horas.

A Aula Newton Galicia, promovida conxuntamente pola Xunta de Galicia, Boeing, a organización sen ánimo de lucro First Scandinavia e Tecnópole, foi inaugurada o 19 de outubro de 2021 e no seu primeiro trimestre de actividade case 300 alumnos e alumnas gozaron desta experiencia de aprendizaxe.

Trátase da primeira Aula Newton permanente en España e, polo momento, a única. É unha iniciativa de divulgación científica gratuíta dirixida a estudantes de 3º e 4º de ESO na que se ofrece formación en ciencia, tecnoloxía, enxeñaría e matemáticas mediante dinámicas de grupo. O estudantado ten acceso a equipos que lle permiten reflexionar, explorar, debater e colaborar en materias STEM.

A Aula está aberta os venres durante o curso escolar en horario de 10:00 a 14:15 horas e nela estanse a desenvolver dúas actividades diferentes. A primeira é “Voando con números: unha aventura aérea”, na que o alumnado, axudado por un equipo de formadores e de instructores de voo, recibe unha misión de rescate e debe planificar e crear un plan de voo e cumplir a súa misión en simuladores avanzados; e a segunda é unha actividade complementaria de iniciación ao voo e construción de drons.

No primeiro trimestre de actividade da Aula Newton Galicia participaron nas sesións preto de 300 alumnos e alumnas de 9 centros de Secundaria galegos. A satisfacción dos participantes foi moi elevada e, de acordo á valoración realizada ao remate da formación, o 100% dos docentes e o 98,6% dos estudantes recomendarían visitar este espazo de aprendizaxe a un compañeiro ou compañeira.

Fonte: Tecnópole