Un consorcio europeo desenvolverá sistemas automatizados seguros

Buscar

Susbcrición Newsletter

Introducir e-mail

Arquivo mensual

Vindeiros eventos

Non hai eventos polo momento

O proxecto SECREDAS, integrado por 69 entidades de 16 países europeos, puxo en marcha un traballo de investigación e innovación financiado con 50 millóns de euros (mediante un consorcio público-privado ECSEL impulsado pola Unión Europea, que financia a innovación en sistemas e compoñentes electrónicos) para desenvolver unha tecnoloxía de referencia para sistemas automatizados seguros, que respecten as novas regulacións de protección de datos. As principais áreas de aplicación serán a automoción, o transporte ferroviario e a saúde persoal.

"Estes tres sectores esixen un alto grao de seguridade, e inclúen tecnoloxías de comunicacións entre vehículos e infraestruturas, comunicacións internas dos propios vehículos e sensores como o radar ou o lidar," segundo explica o investigador Jorge Villagrá, responsable do programa Autopía para o desenvolvemento de vehículos automatizados, do Centro de Automática e Robótica do CSIC, centro membro do consorcio.

O proxecto SECREDAS (Product Security for Cross Domain Reliable Dependable Automated Systems) empezou o pasado 1 de maio, e a reunión inaugural celebrouse o 16 e 17 de maio en NXP Semiconductors, en Eindhoven (Países Baixos), entidade coordinadora do proxecto, que durará tres anos. Espérase que os primeiros resultados se presenten no ITS European Congress do 3 ao 6 de xuño de 2019, en Munich (Alemaña). Os membros do consorcio esperan que aproximadamente un 25% dos novos vehículos que circulen por estrada estarán equipados con tecnoloxía SECREDAS cara a 2030.

A interrelación de seguridade e privacidade de sistemas conectados e automatizados en múltiples dominios de aplicación é unha preocupación para moitos consumidores na Unión Europea. "Por exemplo, un de cada catro compradores/usuarios potenciais en Europa de vehículos automatizados é reticente, debido principalmente á falta de confianza na súa seguridade", indica Villagrá. "De aí que as comunidades industriais e científicas necesiten traballar nunha resposta para asegurar que estas preocupacións non supoñen un obstáculo para futuros desenvolvementos nos sectores do transporte e o coidado da saúde persoal", engade.

O principal obxectivo de SECREDAS é desenvolver e validar tecnoloxías multi dominio (aplicables en diversos sectores), arquitecturas de referencia, compoñentes e aproximacións axeitadas de integración e verificación para sistemas automatizados, así como ter en conta e influír na estandarización, certificación e cualificación en diferentes dominios, combinando a alta seguridade e a protección da privacidade, mentres se preserva a seguridade funcional e a execución operacional.

"Con SECREDAS darase un paso importante na dirección de desenvolver compoñentes que ofrezan confianza e subsistemas para, en particular, as industrias europeas do transporte e a medicina de mañá", sinala Villagrá.

A visión de SECREDAS é dar un paso importante proporcionando os medios para aumentar esta confianza. Isto contribuirá a facer que os vehículos conectados e automatizados sexan unha realidade no mercado, para asegurar que os fabricantes europeos de equipos, sistemas integrados e semicondutores sigan sendo competitivos e que sigan sendo líderes mundiais. Ademais, SECREDAS márcase como outro obxectivo mellorar a ciberseguridade entre diferentes dominios de aplicación, desenvolvendo as tecnoloxías relacionadas coa privacidade e a seguridade de sistemas automatizados nos sectores dos coidados de saúde persoal e ferroviario.

(Fonte: CSIC)