Conexiona gana o reto de industria 4.0 lanzado por Finsa para xestionar mobiliario de forma intelixente

Buscar

Susbcrición Newsletter

Introducir e-mail

Arquivo mensual

Vindeiros eventos

Non hai eventos polo momento

A tecnolóxica galega Conexiona gañou o reto de industria 4.0 lanzado polo Grupo Finsa a principios de ano. A empresa, situada en Tecnópole, foi seleccionada por desenvolver a mellor solución para a necesidade do grupo madeireiro de contar cun sistema que lle permita xestionar de forma máis intelixente o seu mobiliario.

O conselleiro de Economía, Emprego e Industria, Francisco Conde, recibiu aos responsables de Conexiona xunto cos da empresa viguesa Deicom Technologies, elixidos pola súa solución ao reto lanzado por Nova Pescanova a través da aceleradora Galicia Open Future.

A solución de Conexiona para Finsa, denominada IoF (Internet of Forniture), permitirá xestionar e actuar sobre os elementos de sensórica de taboleiros e outros produtos de madeira instalados no fogar. A madeireira galega tamén busca desenvolver unha plataforma que almacene datos de uso dos produtos para poder obter así un histórico que permita evolucionalos. A súa idea é que sexa unha plataforma aberta a todos os fabricantes para crear no futuro un ecosistema do que múltiples axentes do sector se poidan beneficiar.

Pola súa banda, Deicom Technologies persegue no reto de Nova Pescanova dispoñer dun modelo de análise preditiva para coñecer o comportamento do lagostino criado en piscifactorías e facer máis eficiente a súa cría.

En total presentáronse 23 empresas, pemes, startups ou organizacións por cada un dos dous retos lanzados no pasado mes de febreiro. Á parte dos gañadores, elixíronse tres finalistas por cada un dos retos. No de Nova Pescanova resultaron escollidos a alianza entre Biostatech e Torus, Gradiant e Gamco. No caso do reto de Finsa, Deicom, Itelsis e Vizibles.

Os gañadores de Galicia Open Future terán unha axuda da Axencia Galega de Innovación (GAIN) de 20.000 euros para a posta en marcha do proxecto piloto e 10.000 euros en concepto de patrocinio. Poderán acceder ademais a un empréstito participativo de XesGalicia de ata un máximo de 100.000 euros. No caso dos finalistas, contarán cun patrocinio por parte de GAIN de 10.000 euros e un empréstito participativo por parte de XesGalicia de ata 50.000 euros. Ademais, seleccionarase un proxecto de entre os finalistas (excluído o gañador do reto) que poderá recibir unha axuda adicional de ata 10.000 euros achegada por Amtega.

No encontro celebrado en San Caetano, o titular de Economía, Emprego e Industria apuntou que a participación das empresas nesta aceleradora demostra o compromiso do tecido empresarial galego coa Industria 4.0 e coa innovación. Neste campo, acábase de activar o Plan Galicia Innova 2020, que mobilizará 1775 millóns co obxectivo de conectar a industria co ecosistema de innovación galego que reside nas universidades, nos centros tecnolóxicos e nos organismos de investigación.

Galicia Open Future forma parte da rede de aceleradoras que desenvolve a Xunta, entre as que se atopan Agrobiotech en Lugo e Ourense, centrada nos sectores agroalimentario, forestal e a biomasa; a Business Factory Auto, con PSA, en Vigo; o programa Connecting future good Galicia, en Santiago, coa colaboración de Vodafone; ViaGalicia, en Vigo e Lugo, que conta co apoio de Zona Franca; a primeira incubadora de fármacos de España, que promoven dende Santiago a Fundación Kaertor e a multinacional Janssen; ou as 6 aceleradoras centradas en proxectos de I+D+i apoiadas dende o ámbito privado.

(Fonte: Xunta e Tecnópole)