¿Como saber canto vale a miña start-up?

Buscar

Susbcrición Newsletter

Introducir e-mail

Arquivo mensual

Vindeiros eventos

Non hai eventos polo momento

¿Canto vale a miña start-up? É a gran pregunta á que se enfrontan os emprendedores cando saen en busca de financiamento para o seu proxecto. Tamén o principal rompedeiro de cabeza para os investidores, que han de afinar a valoración dunha empresa sen case métricas fiables sobre o seu negocio e mesmo nalgúns casos sen facturación.

"O gran problema que ten o sector é que as empresas non saben canto valen e os investidores moitas veces compran a ollo", sinala Francisco Mariscal, conselleiro delegado de Fellow Funders. "Se ao emprendedor lle preguntas canto diñeiro necesita sempre che vai dicir que máis, mentres que o investidor vai intentar rebaixar a cantidade o máximo posible", agrega.

Para atopar un valor xusto (ou Fair Value, como denominaron á ferramenta), Fellow Funders desenvolveu un programa de scoring, o primeiro que ve a luz en España enfocado a este tipo de empresas, que permite ao emprendedor ter unha radiografía do seu negocio con só completar un pequeno cuestionario a través de Internet.

Estas preguntas van dende a implicación do equipo fundador á escalabilidade do proxecto, os seus competidores, as vantaxes competitivas da súa proposta ou o modelo de negocio. En función do que responda, o programa emite unha nota global, de entre cero e cen, e un rango de valoración da compañía.

"A ferramenta axuda a poñer un punto de referencia ás empresas e medilas todas cun baremo similar. Queremos contribuír a profesionalizar un mercado que ata agora foi moi pouco transparente", apunta o conselleiro delegado.

Tres servizos

Detrás deste desenvolvemento hai un modelo matemático que Fellow Funder desenvolveu e axustou durante os últimos anos -antes mesmo de fundar a compañía- e que eles mesmos empregan para decidir que proxectos entran na súa plataforma de financiamento. "A tecnoloxía témola dende antes de que nacese Fellow Funders. Foron varios business angels e fondos de venture capital os que nos pediron poder usala", confesa Mariscal.

Fair Value ofrece tres servizos: unha análise básica gratuíta, enfocada ás empresas nunha fase semente; un informe avanzado, que custa 29 euros e que dá acceso ao emprendedor a un resumo das súas fortalezas e debilidades; e o máis avanzado, que inclúe unha due diligence realizada por un grupo de expertos. Ademais, o emprendedor pode compartir esta análise coa comunidade de investidores rexistrados.

Óscar Vallés, responsable de Riscos en Fellow Funders, explica que este procedemento do scoring non é novo. "A verdade é que non somos nada orixinais. A maioría de nós vimos do sector financeiro e isto son cousas moi normais. Hai instrumentos financeiros complexísimos que se poden valorar e resulta que eramos incapaces de dar unha valoración estimada dunha pequena empresa", conclúe.

Fellow Funders: 16 proxectos e nin un 'default'

Dende que iniciase a súa actividade en decembro de 2016, Fellow Funders, a plataforma de equity crowdfunding fundada por exdirectivos de Banco Santander, canalizou investimentos por valor de 3,3 millóns de euros en máis dunha quincena de start up. "De16 compañías financiadas en dous anos non tivemos nin un só default (suspensión de pagamentos) e a empresa que menos creceu dobrou métricas", asegura o seu CEO, Francisco Mariscal. Os investidores destinan, de media, 2300 euros a cada proxecto e fano cunha recorrencia de, polo menos, dúas veces ao ano. Unha proba, ao seu xuízo, de que o investimento alternativo se consolida en España. "Non somos a primeira plataforma nin seremos a última. Isto é unha carreira longa", conclúe.

(Fonte: Expansión)