Comezan as Aulas Tecnópole e o curso de capacitación en proxectos científicos para profesores

Buscar

Susbcrición Newsletter

Introducir e-mail

Arquivo mensual

Vindeiros eventos

Tecnópole inicia estes días dúas actividades de capacitación de estudantes e profesores no ámbito da ciencia e a innovación: as Aulas Tecnópole, que alcanzan a súa cuarta edición, e un curso destinado a docentes para que poidan axudar aos seus alumnos a preparar proxectos, que se realiza por primeira vez este ano no marco da Galiciencia e para o que viu desbordado a cota de inscrición.

As Aulas Tecnópole comezaron o curso 2013-2014 coa participación de 86 alumnos e alumnas procedentes de dez centros da provincia de Ourense, que desenvolverán os seus proxectos científicos e innovadores ata maio de 2014.

Durante estes oito meses, os estudantes trasladaranse unha tarde por semana ás instalacións que Tecnópole acondicionou especialmente para eles, en dúas quendas de mércores e xoves para que a atención dos formadores -con ampla experiencia docente e de desenvolvemento de programas destas características- sexa máis personalizada.

Os estudantes, todos eles de segundo ciclo de Secundaria e Bacharelato, recibirán formación sobre as pautas que debe seguir unha investigación científica rigorosa e a estrutura que debe ter a memoria escrita na que se recolla o proxecto. Os seus ámbitos de traballo abranguerán todas as áreas do coñecemento, dende as novas tecnoloxías e a informática ata as ciencias ou as humanidades.

Aínda que a decisión final sobre o obxecto dos seus proxectos será dos equipos que formen os alumnos, os formadores propuxéronlles varias ideas ás que algúns xa se apuntaron.

Do pan perfecto a xogos para o móbil

No ámbito experimental e ambiental, un dos proxectos que levarán a cabo os estudantes das Aulas Tecnópole será unha investigación sobre a relación entre a música e o crecemento bacteriano. Noutro deles os estudantes tratarán de desentrañar a fórmula do pan perfecto, baseándose en parámetros de calidade e máxima durabilidade.

No ámbito TIC, os alumnos e alumnas recibirán nocións de programación para poder levar a cabo o seu proxecto, que poderá consistir na elaboración dun programa informático (por exemplo, un xogo para o móbil) ou no desenvolvemento dun prototipo (como un robot de limpeza de chans).
 
No ámbito das humanidades, un dos proxectos que se abordará será a reconstrución virtual das ruínas de varios monumentos de Ourense para ver como eran en orixe mediante tecnoloxía 3D.

As Aulas Tecnópole enmárcanse no programa de divulgación da ciencia e da innovación que a Tecnópole leva a cabo dende os seus inicios para achegar a súa actividade á sociedade e contribuír a espertar vocacións científicas e incentivar o espírito emprendedor entre os máis novos.

Os participantes no curso terán ocasión de presentar os seus proxectos en Galiciencia, a feira científica e de innovación que organiza Tecnópole a finais de novembro, e noutros certames estatais, como a Exporecerca Jove que se celebra en Barcelona.

Curso para profesores

Como novidade, a programación da Galiciencia incluirá este ano unha actividade demandada polos docentes galegos e que terá lugar de xeito previo á celebración do evento. Entre outubro e principios de novembro celebraranse nas catro provincias talleres de capacitación dirixidos aos profesores e profesoras de Bacharelato, Secundaria e FP para que poidan axudar aos seus estudantes a preparar proxectos científicos, tanto para presentar á edición da Galiciencia do ano próximo como a outros certames similares de carácter estatal.

O primeiro dos cursos comezou este luns día 14 para os profesores de Ourense nas instalacións de Tecnópole. O martes comezou en Lugo e a finais de mes farao en Santiago e Vigo. Cada un deles ten unha duración de seis horas repartidas en dúas sesións, cunha semana de intervalo entre elas.

A iniciativa espertou un grande interese na comunidade docente, ata o punto de que se rexistrou unha demanda de participación maior que o número de prazas. Para os que quedaron fóra da convocatoria, a documentación do curso está dispoñible en aberto na web de Tecnópole.

(Fonte: Tecnópole)