Carles Puente, mellor inventor europeo 2014

Buscar

Susbcrición Newsletter

Introducir e-mail

Arquivo mensual

Vindeiros eventos

Non hai eventos polo momento
Carles Puente Baliarda, investigador español e creador da antena fractal, foi nomeado a mellor inventor europeo 2014. É posible que moitos descoñezan que foi o catalán Carles Puente Baliarda o que en 1995 desenvolveu a antena fractal, capaz de integrarse no teléfono móbil máis pequeno, ofrecendo un avance revolucionario no mundo da comunicación móbil.

Tres patentes da empresa Fractus -da que Puente Baliarda é un dos cofundadores, así como o seu director e xefe científico- sobre esta tecnoloxía desenvolvida por eles hai case 20 anos valéronlle unha nominación ao Premio ao Inventor Europeo 2014 na categoría de 'Pequenas e Medianas Empresas'. Hai cinco categorías e tres nomeados por cada unha. O Premio outórgao cada ano a Oficina Europea de Patentes e vai xa pola súa novena edición.

A nominación de Puente Baliarda aos 'Oscar' da innovación tecnolóxica foi recibida "como unha honra na empresa. Vivímolo como un premio porque é moi difícil recibir esta nominación", segundo nos contou nunha entrevista a Portaltic o investigador. "Somos conscientes do impacto que a nosa tecnoloxía tivo no mundo da tecnoloxía móbil, que é unha das industrias máis importantes do mundo," dixo.

Puente Baliarda destaca "o importante investimento en I+D que fixo a súa empresa durante os últimos anos e o desenvolvemento continuado de novas tecnoloxías. Fractus obtivo éxitos nos últimos anos tanto no ámbito tecnolóxico como empresarial". Posúe máis de 150 patentes e solicitudes de patentes no sector da tecnoloxía de antena. A nominación ao Inventor Europeo 2014 suma outro logro para esta empresa de só 20 empregados.

Un teléfono móbil integra moitas tecnoloxías que son esenciais, unha delas é a tecnoloxía de antena desenvolvida por Fractus en 1995. As patentes nomeadas solicitáronse en 1999, 2000 e 2001 e estendéronse a outros mercados, mentres que as concesións destas patentes chegaron uns tres anos despois, dependendo dos países.

Calquera comunicación de datos, de voz ou de vídeo ten que pasar pola antena. Segundo nos explica Puente Baliarda, "a tecnoloxía fractal é unha tecnoloxía de antenas, especialmente aplicada a aplicacións para teléfonos móbiles. A tecnoloxía consegue reducir o tamaño da antena e polo tanto permite que se integre dentro dos teléfonos móbiles, o que fixo posible eliminar a antena externa que se despregaba dos dispositivos hai uns anos ".

Outra das vantaxes que ten esta tecnoloxía para o usuario é que "unha única antena é capaz de transmitir e recibir en varias bandas de frecuencia, o que se traduce nun aumento da capacidade das redes de telefonía móbil para ter máis usuarios e para albergar servizos de conectividade a redes de datos de alta velocidade, a internet para poder baixar contido multimedia, etc."

O mundo das patentes

Fractus é a entidade española con máis solicitudes de patentes, xunto co Centro Superior de Investigacións Científicas (CSIC). A nivel mundial, polo menos hoxe en día, parece que ninguén pode facerlle sombra a xigantes como Estados Unidos ou China. Segundo o investigador español, "a sociedade europea non é tan innovadora como a sociedade estadounidense. Por varios motivos en Europa tivemos un sistema de patentes fragmentado e iso freou o seu desenvolvemento, en comparación como o de EE.UU ou China".

Aínda así, Puente Baliarda destacou a evolución que está a ter lugar no sistema europeo e exemplo diso é a creación da patente unitaria, que permitirá a partir dos próximos anos defender os dereitos en toda Europa cunha soa patente. España está fóra dela, feito que lamenta o investigador catalán.

Á hora de aconsellar outras empresas pídelles que "pensen en grande porque o mercado global é accesible a calquera empresa e para iso é necesario ter unha visión de empresa moderna". Ás PEMES de carácter tecnolóxico anímaas a que coiden a súa carteira de patentes porque, asegura, "é esencial".

As patentes en España

Segundo datos da Oficina Europea de Patentes (EPO), en 2013 o número de solicitudes de patentes de España caeu un 1% con respecto ao ano anterior, pasando das 2501 rexistradas en 2012 ás 2476 de 2013. A diferenza é abismal fronte ás solicitudes presentadas por Alemaña que, malia que tamén sufriu un descenso do 5,4%, mantense á cabeza dos países europeos con máis de 32.000 solicitudes, seguida de Francia, con 12.417, que rexistrou unha suba dun 1,1% respecto a 2012. Das 66.712 patentes concedidas en 2013 en todo o mundo, só 395 foron españolas.

En canto aos campos técnicos, tamén segundo a EPO, aqueles nos que máis solicitudes de patentes se presentaron en 2013 a nivel mundial foron a tecnoloxía médica, a maquinaria e enerxía, a comunicación dixital, a tecnoloxía informática e o transporte.

O Premio ao Inventor 2014 outorgarase en Berlín o próximo 17 de xuño.

(Fonte: Innovaticias)