A automoción galega deseña autoestradas intelixentes adaptadas ao coche autómata

Buscar

Susbcrición Newsletter

Introducir e-mail

O coche sen condutor é o gran reto da automoción mundial. Os principais construtores están a pisar a fondo o acelerador da condución autónoma, coa data do 2020 no obxectivo para iniciar a súa introdución gradual no mercado.

Non é ciencia ficción. É posible, porque a tecnoloxía existe por parte da industria do automóbil. As probas experimentais demóstrano. Como o fito que protagonizou hai uns meses un C4 Picasso fabricado na planta de PSA Vigo e equipado polos enxeñeiros do CTAG (Centro Tecnolóxico de Automoción de Galicia) que circulou de forma autónoma dende Vigo a París (3000 quilómetros).

A experiencia, pioneira en Europa, avanza o que se está a preparar nos laboratorios de ensaio dos principais construtores de coches. Algúns non queren esperar e xa ofrecen aos condutores máis temerarios modelos como o Mercedes Clase E ou o Tesla Model S en versión autónoma, capaces de circular por tramos de autoestrada sen que o condutor teña as mans ao volante, aínda que non sen quitar a vista dunhas estradas que non están preparadas para os coches sen condutor.

Primeiro sinal de alerta

Desgrazadamente, hai uns días transcendeu que un destes Tesla rematou encaixado nos baixos dun camión cando circulaba en modo piloto automático. O accidente cobrouse a primeira vítima da condución autónoma, e investíganse as causas. Todo un sinal de alerta nun momento en que as necesidades da condución autónoma empezan a preocupar aos responsables dos trazados de estradas, autoestradas e autovías polas que os coches autómatas circulan.

Neste punto é onde se enmarca o traballo conxunto que comezaron a facer Ferrovial e o CTAG galego. O seu plan é impulsar o despregamento de autoestradas intelixentes que se adapten ás novas necesidades tecnolóxicas da condución autónoma e a fagan máis efectiva.

"Trátase de adaptar as infraestruturas e facer probas de campo para conseguir que o vehículo estea perfectamente conectado coa vía pola que circula e reciba o máximo de información para tomar decisións, e optimizar as súas prestacións", explican fontes do departamento de Innovación do operador de infraestruturas.

Cimbra, a filial de autoestradas de Ferrovial, e os enxeñeiros galegos do departamento de electrónica avanzada do CTAG están a preparar probas de condución autónoma en tramos concesionados pola autoestrada do norte de Portugal a-27 entre Viana do Castelo e Ponte de Lima.

"Estas primeiras probas realizaranse en ámbitos pechados ao tráfico mediante o corte controlado de varios quilómetros da autoestrada", explica a compañía. "Somos conscientes de que isto é imparable, e se as infraestruturas se preparan de forma axeitada, a introdución da condución autónoma será moito máis rápida", engaden.

"Isto é imparable"

Instalación de miles de sensores, cámaras, radares e unidades de comunicación; o despregamento de quilómetros de rede de fibra óptica. ¿Toda esta tecnoloxía avanzada encarecerá moito o custo das autoestradas? Dende Ferrovial aseguran que non. «As autoestradas xa están equipadas actualmente con rede de fibra óptica, que nos facilita en tempo real a información do estado da infraestrutura. Trataríase só de conectar os equipos de comunicación, que tampouco son custosos. Os sensores están a seguir unha tendencia de abaratamento moi rápida, porque a súa utilización é crecente en todos os ámbitos», asegura a compañía.

Ferrovial e o CTAG déronse tres anos de prazo neste primeiro acordo de traballo para avanzar no despregamento de autoestradas intelixentes en España, Francia e Portugal.

Vías conectadas ao coche

Francisco Sánchez, o director de sistemas do CTAG e responsable dos equipos de investigación que traballan no desenvolvemento de automatismos para estes vehículos, explica que o proxecto de Ferrovial se enmarca nun programa europeo denominado Scoop, que vai testar a grande escala a interoperabilidade entre vehículos autónomos e trazados viarios destes tres países.

¿Que terán de especial estas autoestradas intelixentes? O despregamento de sensores ata na pintura do firme, os sinais estandarizados, o ancho dos viarios ou a lonxitude do carril de incorporación estarán adaptados á condución sen mans, sen ollos e, algún día, sen cerebro.

As probas consisten en equipar os tramos elixidos co que os enxeñeiros denominan unidades de comunicación cooperativas. "Téstase o funcionamento do coche autónomo en percorridos de 4 ou 5 quilómetros con usuarios non autónomos, que nos achegan a súa opinión sobre como interaccionan vehículo e estrada", afirma Francisco Sánchez.

O reto está moi próximo xa. No horizonte do 2020 a condución autómata permitirá por primeira vez apartar a vista durante longos tramos de autoestradas e autovías.

O gran salto no coche sen piloto producirase na seguinte fase, na que o viaxeiro poderá desconectar mentalmente da condución durante longos períodos. Na última fase, que chegará en torno ao 2050, o coche será totalmente autónomo e xa non precisará condutor.

Hai moito traballo por facer para conseguir a condución máis intelixente e segura posible, que é o obxectivo final. "O coche ao que imos delegar a condución ten que comportarse dun xeito moi humano", asegura Francisco Sánchez.

(Fonte: La Voz de Galicia)