A industria alimentaria busca alternativas seguras ao plástico non reciclable

Carne, ovos, produtos elaborados con castañas, marmeladas, hortalizas, froitas... Galicia ten produtos dunha gran calidade que, agora cada vez máis, botan man do packaging para lograr un mellor posicionamento no mercado. O envase conta. E moito. A cuestión é cal elixir nun momento no que o plástico non reciclable ten os días contados.
 
A UE acordou prohibir os plásticos dun só uso no 2021, un horizonte que a industria agroalimentaria non ve tan afastado. O cambio de rumbo fixo que tanto as empresas de alimentación como as compañías de embalaxes ou os pequenos produtores dean un xiro de temón para buscar envoltorios sustentables, reciclables e respectuosos co medio ambiente. A cuestión é que, ademais de todo iso, han de priorizar a seguridade alimentaria. Porque hai que andar con ollo, xa que algúns envases presuntamente «biodegradables», «ecofriendly», «bio» ou «100 % bambú» non o son tanto.
 
Incluso a Comisión Europea abriu un debate sobre o asunto do bambú, un material que se postula como o gran substituto das palliñas de plástico. Un grupo de debate dentro da UE cuestionou os envases ou cuncas bambú ao comprobar que moitos deles non cumprían cos estándares sanitarios marcados polo organismo europeo. Un informe realizado pola Comisión Europea explicaba que durante os últimos anos se rexistraron varias alertas relativas á presenza de sustancias como a melanina ou o formaldehyde en envases de bambú que excedían os niveis tope de 2,5 e 15 miligramos por quilo, respectivamente.
 
Workshop sobre packaging
 
Esa foi unha das cuestións abordadas por Marta Álvarez, responsable de área de materiais en contacto cos alimentos da consultora Sigillum Knowledge Solutions no workshop sobre packaging alimentario organizado en Santiago polo Clúster Alimentario de Galicia (Clusaga), en colaboración coa Axencia Galega de Innovación (GAIN). "Temos que priorizar a seguridade alimentaria", apunta esta experta, quen falou do hándicap que supón neste sentido a gran variedade de normativas que conviven respecto diso no mundo.
 
O reto agora está en achar alternativas que, ademais de cubrir o oco deixado polo plástico dun modo san, manteñan as propiedades barreira que ten o plástico á hora de conservar os alimentos. Neste sentido, o representante no workshop de Ainia Centro Tecnolóxico, Enrique Rei, comenta que "máis que desterrar o plástico, o que se busca é acabar con todo aquel que non poida reutilizarse ou que non sexa reciclable. En dez anos a normativa europea indica que máis da metade dos residuos plásticos deberán de ser reciclados. Ademais, todos os envases de plástico comercializados na UE deberán de ser reutilizables ou poder reciclarse de maneira rendible.

O importante é reutilizar e reciclar".

Como? Introducindo o envase na economía circular, título da intervención da representante de Ecoembes na xornada, Teresa Sebastiá. O que está claro é que tanto a industria alimentaria como os pequenos produtores como as propias compañías de envases están implicadas nun cambio de mentalidade que avanza cara á reutilización para evitar a degradación do medio ambiente.

Proxecto piloto

A xornada organizada polo Clusaga en colaboración con Gain forma parte dun proxecto piloto de implantación de metodoloxías de deseño estratéxico do sector alimentario do Programa de Deseño para a Innovación 2020 da Xunta de Galicia.

Nesta experiencia piloto está previsto que participen unha decena de empresas socias de Clusaga co obxectivo de achegar o deseño ao tecido produtivo galego para impulsar medidas de colaboración de cara á xeración de produtos e servizos innovadores que atendan á novas esixencia do mercado e os consumidores.

Na liña de sustentabilidade, o Clúster Alimentario de Galicia traballa na incorporación dunha Comisión de Sustentabilidade e Economía Circular ao eixo dous Emprendemento, sustentabilidade e avance de cara á fábrica do futuro do seu plan estratéxico 2021-2025.

(Fonte: La Voz de Galicia)